甘乃威 你要爭氣

我並非港島人. 但我十分肯定如果我是港島選民, 一定會選甘乃威.

白鴿黨人太忘恩負義. 去年區議會選舉泛民仆直, 唯獨中西區依然能交出成績, 甘乃威居功至偉. 他絕對是白鴿黨在港島區最重要的樁腳, 無名英雄. 他本來老早可以進立法會, 但他三番四次讓賢. 二千年讓予余大狀. 零七年讓給陳太. 老實講, 這兩次選舉, 我完全不覺得甘乃威會輸給鍾樹根/孽瘤, 只要泛民踩盡油全力支持他. 但基於對名牌的迷信, 甘乃威一次又一次地讓, 然後退居中西區當其樁腳.

好了, 區議會輸到仆街, 白鴿黨聞到棺材香, 才開始搞接班. 誰不知黨中央又要甘乃威讓位予那個在IT界輸硬的皇太子. 他自己長佔不義的功能議席, 本是不義之人, 在界內撈唔掂, 又要人家讓一個直選位給他, 這是什麼鳥道理? 他除了知名度, 除了是教父欽點的皇太子, 他還有什麼? 他有落區嗎? 有挨家逐戶洗樓接CASE嗎? 他憑甚麼要人家讓位?!

好了, 甘乃威不讓位, 竟然被指逼宮. 喂大佬啊, 不是早說好由他掛頭牌? 誰逼誰宮呀?

還有那肥佬, 想做king maker, 不斷在報紙內玩造神, 日日歌頌陳太, 玩勸進. 早前說要把甘乃威排在陳太後面, 但兩人根本格格不入. 皇太子不願意排陳太後面, 那麼叫他回去選IT界, 或者回去耕田好了, 為什麼要開足馬力去封殺甘乃威? 好了, 現在陳太不選了, 搞咁多野, 何苦?

現在的形勢, 正好考驗甘乃威的智慧. 如果我是他, 我會忍辱負重拿下自己一席. 入立法會後, 連中西區大批樁腳連根拔起, 過檔社民連. 那麼下屆皇太子就有位了, 看他能選出些什麼.

所以甘生, 請爭氣, 越被人睇死就越要爭氣. 你要告訴全香港, 第二梯隊不是垃圾, 那些佔著茅坑不拉屎的老而不才是.

延伸閱讀:

1-555-confide: 甘與陳

之子于歸 宜其室家

早就想重開呢個blog. 一直都懶得寫, 既然好友小登科, 就寫幾句恭喜佢, 當係新開張的預告.

咁你又唔駛講到同是天涯淪落人. 人有三衰六旺, 最緊要企得夠硬, 等到o個一日黎到.

恭喜娶到個好老婆. 咁就一世, 飲得杯落. 又恭喜你家國不分, 以後週年紀念都唔駛諗節目. 諗去邊真係好Q煩.

總之恭喜啦, 希望九月在倫敦再聚.

戰利品展示會

最近部機甚虧. 補返d日記.

書展. 當然要去掃下書. 即係咁, 我好很窮, d貴貴既台灣書, 我就真係買唔起; 大陸書又越整越貴. 書展似乎已經成為我執平書的唯一機會. 雖然我覺得書展係一個非常之唔適合買書既場合, 但係為左慳幾舊水, 又唔可以唔去掃.

行左六個鐘, 怒打書釘, 希望可以最短時間內搵到最多自己想睇既書. 仲慘過制水去排隊裝水.

最後買左十八本書, 如上圖. 有d書我心儀已久, 不過好Q貴, 唔捨得買, 去到書展劈價就係好時機. 例如紅衛兵日記, 或者jamie oliver既recipe. recipe竟然只售126. 抵到呢.

又有d書呢, 話題之作. 陳冠中o個本係啦, 呂大樂本四代香港人, 我遍尋不獲, 唯有買本重版既唔該埋單補數.

又有d書係揭過覺得有趣既. 例如把妹達人. 把妹即係溝女. 呢本俾女朋友見到, 一定會焚書坑儒 (即係坑我).

總共18本書, 共銀1153元正, 真係盛惠哂. 還好, d書揀完返黎, 睇過d書評, 都唔錯. 證明自己都有d眼光, o係咁既惡劣環境之下都仲揀到書.

二零零七年八月一日

又來舉債. 舉文債.

本來應該要趕o係二零零七年八月一日寫呢篇blog既. 極之重要. 但係趕唔切. 我既人生總係充滿遺憾.

過幾日再算啦. 要組織

嚴正聲明

最近事忙, 唔係好得閒諗野.

但係都要嚴正聲明. 我今日絕對唔會買明光社既旗. 兼且如果有人叫我買, 我都會投以凌厲既目光.

希望大家都唔好買. 聲明完畢.

校服

好耐冇睇過blog, 亦好耐冇寫過blog. 我一唔寫, d讀者數量就直線下降. 咁即係迫住要成日寫啦.

渣老闆最近有一篇講校服. 真係令人懷念. 懷念自己既校服.

我一直都認為自己間學校既校服係全港最型既男裝校服. 型在邊度呢? 第一係恤衫冇校章. 我地係要買一個好細個既鐵校章, 扣o係條呔上面. 每朝打呔都要好小心, 因為扣針會拮到手指流血.

我好怕o個d心口袋繡住大大個校章既校服. 雖然敝校既校徽十分之靚, 但係繡o係恤衫上面, 依然係難睇.

學校曾經出過一套新既校服, 就係恤衫有繡校章. 推出之後舉校嘩然. 當時學校o係lobby擺左個樣式出黎俾我地睇, 我既同學 (f.6)即刻爆左句 “oh shit, what the fcuk is this!?" 之後校方就冇再提改校服.

第二係校呔靚, 如果我要選全港最靚既校呔, 敝校既呔最少係頭三名. 靚在唔似校服. 黑色呔, 有紅白色既幼斜間. 我覺得打左上去, 穩重成熟得黎, 又唔會好老餅. 就係因為呢條呔, 令到我地既校服似西裝多過似校服. 有師兄甚至到今日都會打校呔返工, 而冇人知道佢打緊校呔.

校呔亦都反映一個學生o係學校既地位. 敝校有好多各式各樣既badge, 例如學生會成員有badge (仲要按部門分顏色, 例如紅色就係紀律部), 校刊編輯有badge, 甚至某d學會都有badge. senior form既同學通常都掛到成條呔都係badge. 我f.6時候就有六個章. 但係有d同學, 成條呔只掛一個校章加一個會章. 通常都係非常之位高權重既人至會咁做, 例如學生會既會長. 會長同佢既cabinet (前後七個人), 會有一個白色既學生會章, 淨係呢個都夠照. 所以上到senior form, 上完PE堂, 好少會戴錯人地條呔 (junior form好常見).

第三係校褸靚. 校褸係黑色既. 上面會釘校徽. 校徽手工非常精緻, 而且有少少金線, 十分之grand. 我估香港冇幾多間學校既學生, 會鍾意自己件校褸. 雖然敝校既校褸亦唔見得特別好 (始終係大地牌), 但係著上身之後, 都唔會好影響觀感. 但係校褸通常只有junior form至會著出街. senior form只會留o係班房著, 要黎頂下冷氣.

其餘時間senior form鍾意著學校既風褸. 學校本身冇一件officially俾全校學生既風褸, 其餘非官方既就五花八門. 但係最多人著既係sports team既風褸. 因為design好睇, 又擋得風, 又夠暖. 敝校既sports team風褸, 又係身份象徵, 因為學校極重視體育. 其實著呢d風褸返學係唔俾既, 不過discipline d先生又隻眼開隻眼閉, 又著得幾好睇, 所以都冇乜人理. 但係間唔中都會捉下既.

其餘冇校隊風褸既, 通常都係著冷衫. 可以著黑, 米, 深藍色. 我個人覺得襯黑或者米色既V領非常好睇. 斯文得黎又襯色.

第四點, 我覺得係學校最大既德政, 就係唔准著白襪. 一定要著深色襪, 黑藍深灰, 淺灰都唔得. 呢一樣野點解係德政, 唔駛講啦.

唯一唔喜歡既係唔俾著黑褲, 要著灰褲. 不過去到senior form, 都冇乜人理, 好多人著勁深色既灰褲, 甚至黑褲. 俾人周就著返兩日灰褲. 所以唔少人衣櫃都有兩隻色既褲.

其實敝校既校服, 只要唔係太瘦削, 唔太矮, 唔係肥到一節節, 又冇寒背A字膊等缺陷, 著上身就一定好睇. 我覺得另外一個原因, 其實係敝校sportsman多, 佢地著乜衫都好睇, carry 件校服完全唔係問題. 型到爆. 所以junior form好少著得好睇. 因為身材撐唔起, 亦因為個樣太細路, 襯唔起一件咁成熟既校服.

其實寫到呢度, 我諗都大把人估到我讀邊間喇卦….

我的十年

來個預告. 未能免俗, 所以想寫寫我的十年. 但還未想好.

Edit: 算罷啦, 都係唔寫. 一來我既過去實在不堪回首. 與其欲語還休, 不如不語. 二來全世界都講"十年", 冇理由走去跟住d官方潮流轉. 咩回歸十週年, 對我黎講, 只係一場鬧劇, 一場笑話. 我寧願企o係旁邊指指點點, 都唔想玩埋一份.

所以, 呢篇文債, 已經變成壞帳.

老左正傳影評 (2): 時間的錯?

看老左, 看到鄭中基罵黃秋生 “時間錯哂", 禁不住冷笑了一聲.

這四隻字當然是左仔對於自己命途坎坷的最有力控訴. 還好鄭中基不是罵"都係英國佬o個班仆街". 但時間真的錯了嗎?

又來講講理論 (不喜的話, 請跳過). 左仔絕不可能認為時間錯了. 曾德成引述馬克思說"存在決定意識". 意思是說任何一種社會意識, 都是由該社會的形態決定的. 所以原始時代根本不可能有人會贊同資本主義, 現代社會不可能有人贊同奴隸制. 而按辯證法, 資本主義這種社會存在 (正), 引發了社會主義的思想 (反), 所以存在決定意識, 是辯證的. 懂辯證法的左仔, 一定會認為資本主義正走末路, 他們的共產主義才是正道. 所以根本沒有時間錯不錯的問題.

(再按: 我d馬克思好三腳貓, 歡迎指正, 等我學下野. 另, 冇興趣可略過不睇. 或者簡單d講, 左仔根本認為自己最終會贏, 何來"時間錯了"?)

所以, 回到前兩篇的結論, 左向港一家絕不是左仔.

那我冷笑什麼? 我不是笑趙良駿不懂馬列, 因為我也不太懂. 只想說, 左仔太也死不悔改了.

他們真的以為自己生不逢時, 遇著殖民統治而不是共產中國.

他們被排擠, 除了因為港英的壓制, 他們的自我封閉也是一個問題. 大家可看前言裡面, 安裕那篇延伸閱讀, 就講到"圍內"這個問題. 因為敵我意識過強, 令他們不能融入香港社會, 與整個社會的主流價值脫節. 左仔連工作, 生活, 都不能離開這個圈子, 何來融入可言? 所以我以前常常覺得左仔像外星人, 為什麼同是生在香港, 同是經歷這些歷史事件, 看見中共滿手血污, 還是心向中共?

本來呢, 如果左仔能透過電影, 好好交代他們幾十年的心路, 我還是會尊重的. 我說他們死不悔改, 只因左仔沒有讓香港人了解他們, 他們也不了解香港人, 這才是錯. 不要什麼都賴時間. 今天的星期日明報, 有人痛罵中產什麼都賴, 其中一項就是賴時間. 說什麼"金融風暴", 其實就是把過失都推給索羅斯, 與人無尤. 稍有正常思考能力的人, 都會知道九七年泡沫已成, 還要大舉入市, 不跳樓才怪. 要等到索羅斯來收拾你們, 你們該慶幸還有時間逃走才對.

老左和中產, 某程度上思維方式是一致的. 畢竟都是香港人. 香港人嘛, 九七年個個跳樓燒炭, 零七年還是炒得熱火朝天. 你敢說這十年有任何反省, 悔改的跡象?

哼, 你以為改變一個社會真的是那麼容易? 也許不需要流血, 但絕大部份不容於主流, 矢志改變社會的人, 都會潦倒一生. 富貴和理想, 沒有高低之分, 而是一種抉擇. 選好了, 不要賴.

所以, 時間沒有錯, 只是左仔們要轉右, 需要一個藉口而已.

補習老師

畢業之後, 一直都搵唔到長工. 而家做緊補習老師, 所以暫時未駛餓死住.

其實我中七一考完AL, 就即刻走左去一間補習社度教中文. 人工唔錯. 讀大學, 讀master, 一直都有補開幾份習. 去到今日, 我都算係好資深下了. 所以人工都可以收得貴少少. 所以唔駛餓死.

我一直覺得, 補習係一種好奇怪既行業. 補習老師既目標, 係要令到學生不再需要自己. 但係當佢唔再需要你, 又代表你冇生意. 用咁既角度諗, 就會知道一般既補習社, 點解只係俾tips, 教捉題目, 而唔係真真正正教人點讀書, 傳授求學之道. 學生識得自己讀書, 等於補習社要執笠. 當然, 香港學生短視, 急功近利, 都係原因.

補習其實係一種好特別既教學經驗. 學生一定好多野問, 尤其是當佢地覺得自己係俾錢請個人返黎問既時候. 我估日校老師唔會面對咁既情形. 但係呢, 你要唔要答佢, 點樣答佢, 定係反問佢, 好鬼難拿捏. 答得佢太直接太仔細, 就怕佢會養成依賴. 答得太隱晦, 又怕佢get唔到. 唔答佢, 佢又會覺得你呃佢錢. 答得慢d, 佢又會以為你唔識. 其實好多時答得慢, 唔係因為唔識, 而係要決定要講d乜野, 要答幾多野.

其實有時會諗, 做補習甚至比做日校有意義, 尤其是o係香港. 做補習, 同學生上堂, 同平時學校o個種單向式的教學好唔同. 基本上你可以不斷要個學生俾反應你, 亦都可以同佢直接對話交流. 教佢d野明唔明, 識唔識, 唔駛睇樣, 一問就知. 甚至佢地既discipline同埋教養, 因為一對一容易建立rapport, 亦都相對地易教易管. 好多時我係唔止教書, 仲要幫埋人教仔, 而且往往佢地聽我話多過聽阿媽話. 可能我依然後生, 所以比較容易同d細路傾偈卦.

更重要既係, 我唔駛好似日校咁, d會開唔停, d無聊行政工作做唔停. 我上咁耐堂, 就同個學生interact足幾個鐘, 冇花冇假. 絕對唔會因為開會唔得閒理D學生.

今日AL放榜, 我有一個學生由佢中二補到而家. 佢CE同AL既中文都有A. 我覺得我咁多年黎教佢既野, 真係幫到佢. 今日收到呢個消息實在高興, 所以為文以誌. 不過佢其他科都係DDEE咁, 希望佢可以如願以償, 做大學生啦.

最近讀什麼

Currently Reading:

Hannah Arendt. 馬克思與西方政治思想傳統.

陳雲. 民主夢一場.

Arendt呢本係中譯本, 翻譯佢o係Princeton既lecture的手稿. 唔知係咪我唔夠班, 硬係覺得佢譯得麻麻. 但係主題非常吸引, 講馬克思主義同西方既政哲傳統有乜關係. 有機會搵本英文睇下. 廿蚊有找既簡體書, 雖然抵睇, 但係d翻譯真係好鬼拗口.

陳雲既政論集, 好睇. 功力深厚, 見微知著, 而且文筆真係一流. 講大陸共產黨既分析, 由理論推到實況, 以小見大, 理論功夫做得好扎實. 呢本書淨係學佢d文字都值回票價.