Feeds:
文章
留言

Archive for 2007 年 06 月

補習老師

畢業之後, 一直都搵唔到長工. 而家做緊補習老師, 所以暫時未駛餓死住.

其實我中七一考完AL, 就即刻走左去一間補習社度教中文. 人工唔錯. 讀大學, 讀master, 一直都有補開幾份習. 去到今日, 我都算係好資深下了. 所以人工都可以收得貴少少. 所以唔駛餓死.

我一直覺得, 補習係一種好奇怪既行業. 補習老師既目標, 係要令到學生不再需要自己. 但係當佢唔再需要你, 又代表你冇生意. 用咁既角度諗, 就會知道一般既補習社, 點解只係俾tips, 教捉題目, 而唔係真真正正教人點讀書, 傳授求學之道. 學生識得自己讀書, 等於補習社要執笠. 當然, 香港學生短視, 急功近利, 都係原因.

補習其實係一種好特別既教學經驗. 學生一定好多野問, 尤其是當佢地覺得自己係俾錢請個人返黎問既時候. 我估日校老師唔會面對咁既情形. 但係呢, 你要唔要答佢, 點樣答佢, 定係反問佢, 好鬼難拿捏. 答得佢太直接太仔細, 就怕佢會養成依賴. 答得太隱晦, 又怕佢get唔到. 唔答佢, 佢又會覺得你呃佢錢. 答得慢d, 佢又會以為你唔識. 其實好多時答得慢, 唔係因為唔識, 而係要決定要講d乜野, 要答幾多野.

其實有時會諗, 做補習甚至比做日校有意義, 尤其是o係香港. 做補習, 同學生上堂, 同平時學校o個種單向式的教學好唔同. 基本上你可以不斷要個學生俾反應你, 亦都可以同佢直接對話交流. 教佢d野明唔明, 識唔識, 唔駛睇樣, 一問就知. 甚至佢地既discipline同埋教養, 因為一對一容易建立rapport, 亦都相對地易教易管. 好多時我係唔止教書, 仲要幫埋人教仔, 而且往往佢地聽我話多過聽阿媽話. 可能我依然後生, 所以比較容易同d細路傾偈卦.

更重要既係, 我唔駛好似日校咁, d會開唔停, d無聊行政工作做唔停. 我上咁耐堂, 就同個學生interact足幾個鐘, 冇花冇假. 絕對唔會因為開會唔得閒理D學生.

今日AL放榜, 我有一個學生由佢中二補到而家. 佢CE同AL既中文都有A. 我覺得我咁多年黎教佢既野, 真係幫到佢. 今日收到呢個消息實在高興, 所以為文以誌. 不過佢其他科都係DDEE咁, 希望佢可以如願以償, 做大學生啦.

Read Full Post »

最近讀什麼

Currently Reading:

Hannah Arendt. 馬克思與西方政治思想傳統.

陳雲. 民主夢一場.

Arendt呢本係中譯本, 翻譯佢o係Princeton既lecture的手稿. 唔知係咪我唔夠班, 硬係覺得佢譯得麻麻. 但係主題非常吸引, 講馬克思主義同西方既政哲傳統有乜關係. 有機會搵本英文睇下. 廿蚊有找既簡體書, 雖然抵睇, 但係d翻譯真係好鬼拗口.

陳雲既政論集, 好睇. 功力深厚, 見微知著, 而且文筆真係一流. 講大陸共產黨既分析, 由理論推到實況, 以小見大, 理論功夫做得好扎實. 呢本書淨係學佢d文字都值回票價.

Read Full Post »

《老左正傳》這部戲,很刻意地塑造香港左派與香港人一起成長的形象。前言已提過《老左》變老港、左長旺變左向港這兩個重要的符號。其實整套電影,為了達到此目的,在很多細節都經過精心的計算。就算是電影海報,都用上了港產LV—紅白藍來做背景。此片的符號多得泛濫 (請看延伸閱讀的《家明雜感》),我的想法是導演是希望以密集形式,將這些符號的信息,強加給沒有學過電影批評的一般觀眾。《家明雜感》說這種安排刻意混雜中港兩地的符徵,意圖建立兩地一體的「和諧社會」,我不以為意,因為左派眼中的符號,的確是中港混雜的。《我的祖國》的出現,只是表示它是一套講左派的電影,僅此而已。

 符號雖多,但無論如何都看得人非常納悶。在前言裡,我說過不想買票進場,免得讓左仔賺我的錢。我肯花錢買票,目的只有一個,就是要看左仔如何交代暴動、文革、和六四。當然,最後結果如何,大家都知道了。 關於左仔,不講暴動、文革和六四,有什麼可講呢?暴動是他們被香港同胞摒棄的開始。這一點《老左》有交代過,左忠求職的遭遇是一例。但沒有交代的是他們為什麼被拋棄。當然殖民政府的鎮壓是一個原因,但他們竟然否認暴行。左向港說他們被打沒有還手,但事實是燒死林彬,遍地菠蘿。他們不單止還手,還害死很多無辜平民。 

如果對左仔的歷史稍有認識的人都知道,文革和六四對他們的影響何其深。四人幫的下台,使他們感到被背叛被欺騙。不少人因而憤而退出左仔圈子。左向港先生有沒有反思過?沒有交代。六四期間,連文匯報也開天窗抗議,左向港會不會覺得,血洗他心愛的天安門,是使他最痛心疾首的事;還是他認為「六四沒有死過一個人」沒有交代。

那這套戲有什麼資格叫《老左正傳》、《老港正傳》?左向港又有什麼資格做「左仔」?

這就是《老左正傳》和真正的香港故事格格不入的原因。也許趙導演誤以為,寫一個小人物,就可以把政治上的頭等大事通通略過不提。但問題是,這個左向港不是那些目不識丁,為生活勞碌半生的小市民,他是一個有理想,讀過馬克思的人。你能相信這種人能像戲中的左向港那樣單純嗎?即使是一個普通小市民,六四那夜看著電視,猶自澘然淚下;對左向港而言,這根本是直接挑戰他的理想。但趙良駿竟然可以隻字不提。

關於這種歷史的空白,我想到的,就是去政治化的政治。趙良駿在此片中,很著意的試圖將整套電影去政治化。整條故事線完全沒有交代重要的政治事件,這已是公論。但更重要的一步棋,是用家庭的溫情,把政治議題,甚至權力的鬥爭掩飾。有一幕是左向港把左忠的衣服寄回大陸,左忠大動肝火,說老爸搞得他沒有前途,被政府趕絕。最後由家中的主婦大喝一聲,說一句「我要維護這個家」,然後一人一碗愛心熱湯,喝過了,一切如常。中國人將state一詞譯成「國家」,就是把對「家庭」的想像套進「國」的概念之中。這一幕放在香港的現況,再加上「國」與「家」的簡化類比,信息就呼之欲出了。阿左和阿右的惺惺相惜,除了是鄰里之情外,還有是下一代的姻親關係。這就好像說:中港都一家人了,還分什麼左右?這是另一例子。

所以,你以為他意圖「去政治化」,他其實是把阿爺的信息放進了「國家」的比喻裡面。尤其是,你要記得,共產黨是講「爹親娘親不及毛主席親」的,一個正統的左派家庭,如果有左忠這樣的兒子,一定會痛罵他中了階級敵人的荼毒,而不是鼓起兩腮坐在一角,而心裡自覺虧欠了他。又一次證明了,左向港不是真正的左仔 (指馬克思主義者),「人人為我,我為人人」似乎更像是一種utilitarianist (效益主義者)的口號。

況且,去政治化本身,就是政治。假如你要在中國對抗共產黨,非常簡單,當家家戶戶都掛毛主席像,你不掛,就是對抗。此即謂「去政治化的政治」。但趙良駿的意思剛好相反,甚麼都可以講,但不要講政治,那才對老共的統治,最為有利。所以呢,放放煙花,拆掉觀塘多起幾楝銀都商場,或者去北京當奧運義工,講什麼政治呢? 

如果要講香港十年的變化,和趙良駿的變化,我想「金雞已死,老左當立」該是貼切吧。香港再不是那一隻紙醉金途的金雞,老左來了,大家單單純純,搵錢至上,其他的,微笑著忘記吧。

延伸閱讀:

家明雜感 : 明修棧道 暗渡陳倉

Read Full Post »

我嫌d字太細隻. 點較大d? 請各高手賜教.

Read Full Post »

精英與服從

飯焦係一個最典型既香港政務官.

飯焦之所以唔肯認錯, 唔係佢死雞撐飯蓋, 而係佢完全承繼左AO黨既心態. 佢真係覺得自己冇錯.

我地而家見到既AO (尤其是羅范o個一代), 究竟係咩人? 六七十年代港大畢業, 主要係讀文科 (當時讀文科既至係精英), 佢地入到政府最核心既職系, 一方面表示佢地係精英中既精英, 另一方面表示佢地願意服膺於殖民政府. 服從係佢地最大既美德, 同時亦係受重用既重要因素.

其實到今時今日, 服從仍然係AO既一大戒條. 我有個朋友, 佢女朋友係做AO, 佢話其實今日要考AO, 能力唔一定要好強, 但係家庭背景同教育背景絕對重要. 屋企係公務員的話, 絕對有著數. 中學讀傳統名校更加著數. 原因係AO裡面既校友網絡, 以及傳統名校o個種對建制既服從意識.

飯焦o個一代, 其實就係陳冠中所講既baby boomers. 基本上係因應住社會同政治形勢, 一路有人幫佢地開哂路清哂場, 俾佢地上位. AO就更加係咁, 八九十年代走左咁多鬼頭, 港英甚至有意提拔一堆華人AO, 要佢地保留殖民地體制, 繼續由AO治港. 曾蔭權而家就係走緊呢條路. 所以, 基本上呢一代治港既AO, 全部都覺得自己係神, 精英主義特別強. 所以飯焦會話香港學生最冇資格批評政府. 所以佢覺得所有阻佢改革既人, 都係白痴同埋既得利益者.

我既估計係, 飯焦o個一代既AO, 會認為自己係精英, 同埋對上司絕對服從, 至會有今日既成就. 精英就代表佢認為所有人都愚昧, 所以佢應該真係覺得葉建源抵炒, 因為佢冇辦法理解政府對教育改革既承擔同美意, 咁白痴既人唔配做教授.而絕對既服從, 就養成佢地死不認錯既性格. 飯焦既公開信裡面, 有一點係好可圈可點既, 就係佢認為自己只係履行職責, 但係就落得咁既下場, 就有”一葉知秋”之嘆. 大家都知, 公務員係靠本CSR同上司既指令做人. 如果件事做出黎好大鑊, 只要佢跟足CSR或上司既order, 就只有CSR, 或者上司錯, 絕對唔係佢錯.睇下呢段:

“我在教育統籌局工作期間,一直認為與社會各界人士,尤其是專責培育未來香港師資的教育學院人士,就教育觀點和政策問題進行溝通、討論交流、爭議,正是我的職責本份所在,目的是希望社會上的意見領袖能夠客觀持平地分析問題。豈料到偏偏是0304年這些日子,我的日常工作就變成了「干預學術自由」。”

, 小心呢段, 飯焦呢條友偷換概念到簡直當人白痴. 叫人炒教授就係”溝通交流教育政策”, 佢梗係做官做到懵L. 但係呢個都係其次. 最重要既係, 佢認為自己只係carry out duties. 可能呢d野係章章叫佢做既, 佢只係執行. 又或者佢覺得為政府清除異見都係一個常秘既職責所在. 但係無論如何, 佢覺得唔公平, 係因為佢對體制, 對上司絕對服從, 但係就做左”政治”犧牲品.

所以AO成日講所謂政治中立, 就係呢種mindset既產物. 以前就係睇倫敦既眼色行事, 而家就係睇北京同問責官既面色行事, 佢地既責任只有服從同執行, 故曰政治中立. 佢地最唔gur既就係, 政治問責, 梗係要向d問責官黎問責啦, 關我地呢d執行官乜事? 但係幾on 9既人都知, AO根本就係決策體制既一部份, 決定資源點調配, 決定政策點執行, 本身就係一種決策, 而且決策標準如何定, 本身就係權力關係既角力, 本身就係政治. AO本身就有呢種雙重標準, 佢地手執權力, 但係往往希望透過口頭上否認自己既權力, 黎推卸對權力問責既義務.所以到今日, 大家明唔明白, 點解當時葉劉推二十三條咁兇狠, 落台時仲覺得自己好冤屈?

服從建制, 精英主義, 同埋有權無責既傾向, 就係AOmindset. 我認同飯焦所講, 佢既辭職的確係引起左社會對畸型政治生態既反思. 因為唯有香港呢種畸型政治同公務員體制, 至會出到飯焦呢種涼薄, 自以為是既仆街狗官! 佢以為自己係”一葉知秋”, 早就有一葉啦, 葉劉呀嘛, 咪又係因為AOmindset太強, 所以要下台囉, 乜你唔知咩? 其實唔只係AO, 我覺得香港既babyboomers, 全部都係有類似既心態. 強烈既精英主義, 同埋對建制與上司既絕對服從, 以至佢地最鍾意我地呢一代既後生仔, 要對佢地絕對服從. 呢一點有機會再講.

 

Read Full Post »

首先要記一筆: blog第一個留言, 係馬沙先生.

我唔敢恭喜你住, 如果將來呢個blog爛尾, 或者好似亞視咁既收視率……咁對你同我黎講都係幾”唔知點”的.

今年端陽佳節, 上晝千里迢迢走去赤柱睇朋友扒龍舟, 曬到暈. 晏晝就去左睇老左正傳. 我唔想叫呢套戲做”老港正傳”, 因為無論係虛構的故事, 或者係現實的生活, “老左”絕對冇資格代表全香港人.

開門見山, 我絕對承認我對香港既所謂”左仔”有難以消除既成見. 尤其是係o個班自以為o係港英時期受盡屈辱, 今日o係議事堂內尸位素餐既尊貴. 我甚至諗過BT呢部戲, 唔好益左仔. 不過最後都乖乖咁買飛睇.

另外, 我睇呢套戲, 亦都係睇成為阿爺御旨開拍既文宣戲, 當然趙導演o係呢套戲所表現既班數, 遠不及當年拍<紅色娘子軍>既謝晉.即係咁, 呢套戲之所以為文宣, 唔係亂up. 回歸十年, 官方同非官方宣傳都舖天蓋地, 好難相信呢套戲擺o係七月一日之前上, 唔係文宣, 此其一; 其二, 世上任何一個共產黨都極重視宣傳工作, 因為社會主義作為一種社會運動, 係需要大量既思想工作配合, 至會搞得成一個運動. 我地生於資本主義社會既人, 硬係唔明點解大陸咁Q多思想運動, 就係因為資本主義本身有佢既自動推動機制, 根本唔需要咩思想運動, 大家都對社會法則瞭如指掌. 如果唔係, 點解江青當年咁多野唔搞, 走去管文宣, 搞樣板戲? 其三, 係近年越黎越多左仔慨嘆人心尚未回歸, 左仔形象依然低落, 趁住回歸十周年, 樓股兩旺, 梗係dump舊錢出黎幫自己拍套戲, 化下粧, 合理之至. 其四, 片名由”老左”變”老港”, 主角個名由”左長旺”變成”左向港”, 盲既都睇得出係為左爭取香港既人心啦大佬.

所以我睇呢套戲, 盡量唔入戲, 睇得好抽離, 因為唔抽離就會中哂佢d宣傳. 另外亦都好強烈地要求自己除低有色眼鏡, 事關趙良駿都未必真係受阿爺既指示去拍每一個鏡頭睇完之後我既感覺係, 如果呢套戲係官方宣傳, 我會贈佢四隻字: 死不悔改. 講既當然係左仔換一個角度黎講, 就有另外四隻字: 過於寫實. 我睇到既野, 同香港既現況實在太match, 無論係幕前既盛世, 定係幕後既廢墟, 都非常之中. 唔知係咪趙導演特登幽阿爺一默啦.

我都睇過其他blogger既影評, 其實佢地寫既好多野, 都係我既感受. 而且有一點係成為公論, 就係呢部戲迴避左暴動, 文革, 同六四. 我會開一章寫寫我點睇呢個問題, 希望可以帶到d新既觀點. 其實最主要既, 我係想用呢部戲黎印證下香港左派一直以黎既心態. 呢一part亦都會開一章. 最後就係講下所謂”雷鋒精神”. 可能仲有野寫, 不過暫時組織唔到. 係咁多先.

最後呢, 有幾句說話希望趙導演睇到. 唔該拍香港左仔之前, 認真少少睇下馬列毛, 同埋睇下香港土共的歷史. 馬克思既思想核心, 係"人類既歷史係階級鬥爭既歷史”. 一個堅信馬克思主義既老左派 (例如左向港), 絕冇可能同阿右亦敵亦友. 只能係敵人, 不能係友, 有友情的話, 就係受資產階級既虛假意識控制如果想將六七十年代香港既左右鬥爭, 用咁既方式略過不提, 導演請你節省少少. 一九五六年既暴動就係共產黨同國民黨既對壘, 你唔係唔知呀嘛. 按老毛既<矛盾論>, 老左同老右係敵我矛盾, 你將阿左生同阿右既關係寫得咁親密, 因住第時文革再來, 你就第一個俾人拉去跪玻璃. 當年謝晉都因為<紅色娘子軍>俾人批鬥, 詳情唔講啦 (知道呢段歷史既人, 可以幫手解畫). 紅色娘子軍貴為樣板戲, 都有位俾人入, 趙生真係要小心小心.

前言都寫咁鬼多. . 未完呀, 仲有延伸閱讀. 包括各大blog的影評同一d關於香港左仔既資料.

延伸閱讀:

影評s:

陳志華: 香港之死 — <老港正傳>

光影記事: 選擇性失憶的《老港正傳》

葉側田: 老港正傳

湯禎兆: 《老港正傳》:揶揄社會主義的虛妄

死火手記: 他們的故事,由我們繼承 –《老港正傳》

關於香港左派:

梁文道: 為香港的左派招魂

安裕周記: 圍內明報: 為人民服務 (陳婉嫻專訪)

垃圾文字老左系列:

金雞已死 老左當立

Read Full Post »

網頁修建中

仲未摸得熟點用. 所以我睇開既blog link, 擺住幾個上黎先. 仲有, 篇序其實係6月17號edit的.

Read Full Post »

Older Posts »