作為拜仁的FANS, 歐聯遇上巴塞是很難受的事. 我都鍾意巴塞, 但係唔好咁早遇到好唔好. 結果俾人大炒出局.
今年的巴塞係除左90年西德, 我一世人睇過最好的一隊波, 贏歐聯係實至名歸. 我甚至認為呢隊波係代表左現代足球: 機動, 整體戰, 全場不停奔跑, 純熟流暢的小組戰術. 成隊波冇乜花巧野, 冇人狂插花, 冇人一日到黑一扭四, 幾乎所有入球都係由傳球製造. 我最鍾意呢一種足球.
講返尋晚對曼聯呢場波, 其實巴塞只係發揮一貫水準, 有睇開佢地踢波既都應該知道, 高控球率, 不斷互傳同埋壓迫搶截都係巴塞既招牌貨. 唔單止今年, 烈卡特時代既巴塞已經係咁, 哥迪奧拿某程度上只係繼承呢種踢法, 只不過佢做得更加細緻. 巴塞既防務做得非常好, 雖然左右閘一齊停賽, 但係熟巴塞既都知, 其實佢地冇左右閘只係少左兩翼進攻既路數, 兩閘做既防守只係捕位捉人. 巴塞真正既防守線係中場, 尋日場沙維同恩尼斯達基本上搶贏哂大部份LOOSE BALL. 佢地又唔大隻, 又矮, 靠既係不斷走動壓迫同埋反應快. 巴塞既中場防守做法係, 搵一個人迫BALL HOLDER, 唔係要搶波, 只係要迫佢交波, 而其他人就要不斷走動截斷傳球路線. 咁做既好處就係HOLDER扭唔到, 而且要好短時間內決定要傳俾邊個, 交多幾腳就好容易出錯, 出現五五波. 而踢過波既都知, 五五波永遠都係靈活反應快既人容易搶到.
沙維同恩尼斯達係得天獨厚既組合. 最恐怖係兩個一樣能攻擅守, 而兩個唔會爭波踢. 呢個係佢地長期係巴塞同門既結果, 一齊由青訓打上黎, 夾慣夾熟. 呢對中場係當今最恐怖既中場組合, 最奇既係兩個人既踢法咁相近, 但係又冇謝拉特同林柏特o係英格蘭既重疊問題. 兩個都能攻擅守, 傳球準 (八成以上), 有一定射術, 體力充沛, 閱讀能力強, 護球能力係歐洲頂級. 佢地之所以搶到咁多五五波, 係因為佢地護球能力實在太勁, 一搶到波就迫唔甩. 防守中場最難學既就係搶第二點, 即係估LOOSE BALL會去邊, 但係佢地兩個呢一項能力係滿分. 所以其實巴塞左右閘同時停賽, 只係影響進攻路數, 後防其實影響不大. 因為中場已經掃左好多波. 後防有PUYOL同PIQUE其實大致做到穩定, 尋日場波即使係高波都唔係太輸蝕.
尋晚哥迪奧拿既針對性部署都係一絕. 費格遜既如意算盤係擺朗尼同朴智星做兩翼, 一來想EXPLOIT巴塞左右閘缺席, 二來係希望兩邊都有人拑制美斯. 但係冇朴智星冇費查既中路, 等於放生左美斯. 結果係呢場波美斯成日O係中間推進, 沙維恩尼斯達同美斯一齊o係中間出現係咁搓波, 曼聯中間既carrick同anderson都唔知睇得邊個. 巴塞中場既傳球能力之強, 即使係車仔出哂艾辛波歷克, 都只能夠逼佢地中場搓, 根本冇辦法搶到波. 呢一場曼聯直頭好似放棄唔迫, 由得佢地玩, 結果出事. 前場五個人連兩閘不斷走, 曼聯暴露太多空位俾佢地. 所以中場球員人人都可以傳, 可以帶波走幾十碼. 費格遜既戰術係完全失敗.
今屆既曼聯, 計整體實力係不及巴塞. 但係我賽前都期望佢地今場會上身, 同巴塞踢得好好睇睇. 但係實在太令我失望. 首先戰術錯哂, 我一直都係咁認為, 巴塞最危險既人, 唔係美斯亨利伊度奧, 而係沙維恩尼斯達. 但係費格遜竟然走漏佢地, 佢第一要怪自己唔睇巴塞, 第二要怪球探冇做功課. 結果就係, 兩球都係贏中場輸送, 1.70m既美斯用頭入波 (仲要係跳錯位用腰力就返, 即係唔係最高點頂), 而曼聯既後衛係神高神大既rio同vidic. 巴塞冇左右閘, 側擊威脅已經唔大, 所以哥迪奧拿安排三個矮仔去中間做波. 冇左費查, 費格遜就必須要用朴智星同佢地鬥搶, 但係竟然擺佢打翼. 下半場費格遜知死, 出泰維斯同朴智星一齊搶, 反而搶到幾球. 但係無以為繼.
第二係曼聯似乎有阿仙奴化既跡象, 冇真正領軍既老將. 我以前欣賞曼聯, 十之八九係因為堅尼. 我敢講冇堅尼冇99年既三冠. 年青球員最難踢逆境波, 因為成日沉唔住氣, 亂走亂踢, 浪費氣力之餘又破壞戰術. 呢個時候老將既經驗好重要, 如何重組隊型, 調整節奏, 要求隊友保持耐性, 呢幾樣野傑斯作為一代名將, 完全唔合格. 呢個絕對係費格遜既責任, 因為佢自堅尼作反之後, 就從來冇賦予隊長應有既責任同權威. 強隊必定要有精神領袖, 車仔有泰利林柏特, 巴塞有佩奧爾沙維, 利物浦有謝四, 甚至AC明知馬甸尼已經唔踢得, 都出佢做正選, 只踢三十分鐘, 穩住局勢就換走. 但係曼聯o係費格遜既高壓管理之下, 出唔到呢一種領袖 (其實老費治下出到既精神領袖, 數黎數去都係簡東拿堅尼笠臣). 踢波既都知, 球員一落到場, 就只有隊長可以控制球員, 將在外君命有所不受. 呢場波就完全暴露呢個問題. 第一球輸得太核突, 而且唔係人地好波, 係部署失誤. 成隊波即時覺得部署唔work, 自亂陣腳. 身為隊長既傑斯, 有責任要督促隊友維持原來部署, 慢慢穩定軍心. 但係好明顯佢冇, 或有但失敗. 上半場既曼聯, 踢左十分鐘輸左一粒就完全洩氣, 直至下半場換入通場飛既tevez至有改善. 我夠膽講, 只要冇人接堅尼班, 曼聯o係英超唔威得幾耐.
第三失望係安達臣出正選, 我一返到屋企, 打開電視, 見到anderson呢隻字, 就知曼聯輸梗. 結果正確, 我成篇分析完全唔講佢, 係因為佢根本冇出現過, 點講? 一隊波隱形左一個, 點會唔輸? 呢條友踢熱刺都俾多佢, 都唔知點解會踢曼聯出歐聯決賽.
第四失望係完全冇走動, 打天才波. 其實呢個都係曼聯一直既問題. 曼聯前線火力其實拍得住巴塞, 但係費格遜自從賣左雲佬買左c朗之後, 一直冇重建一套熟練既進攻模式. 佢地入波多, 係打天才波, 靠c朗柒扭, 靠朗尼捕機會, 靠泰維斯爛打爛搶, 成隊波冇playmaker, 冇細緻既小組進攻. 係今年berbatov黎左之後就有返d小組睇, berbatov係唯一一個曼聯中前場能夠hold住個波超過五秒搵隊友既人. 尋晚場波一輸之後, 曼聯既中場進攻報廢, 次次都係後防斬上去, 轉wing, 越位. 正中巴塞下懷, 巴塞就係明知你會攻佢兩翼, 所以兩閘棄攻. 下半場c朗去邊線, 哥迪奧拿即時要puyol跟住佢, 成功凍結, 最後一張王牌都報廢.
但係最最最失望, 係曼聯太冇品. 我直頭覺得佢地係賽前以為贏硬, 落到場輸左第一球就如夢初醒. c朗繼續插花, 繼續浪射, 繼續一跌低就望住球證唔追波. 去到後來成隊波沉唔住氣, 好多冇品既犯規, 史高斯一腳掃落去人地既新人度, 根本係收山腳, 要腳唔要波. 如果係輸唔起既, 拉隊走人囉, 打咩茅波? C朗呢d幼稚到自以為世界球王都算, 史高斯咁多年老波骨都沉唔住氣, 班細既咪有樣學樣囉.
我既總結係, 巴塞既勝利, 係團體足球既勝利, 係紀律, 合作, 無私奉獻既勝利. 我開心, 老實講, 唔係因為巴塞贏波, 而係因為曼聯輸. 一隊自視過高又冇球品既球隊, 需要懲罰, 最後唔止輸波, 仲輸埋尊嚴. 巴塞最後贏波, 證明左足球依然美好.
very comprehensive analysis
曼聯唔打壓迫，的確係出事
另安達臣打得唔好，就令卡域克打得更吃力
只顧到防守，而顧唔到連繫前與後
老將方面都唔係無
傑斯同史高斯在在陣
曼聯輸波係預期中事
只不過輸成咁就真係老費戰術問題
寫得好﹐神奇﹑頂級﹑超卓﹗一個字﹕正。
Jansen:
其實只要戰術得宜, 兩隊波可勢均力敵. 亨利明顯不在狀態. 崩了兩翼, 只要堵死中路, 又有高佬鎮守後防, 巴塞會像對車仔一樣老鼠拉龜. 如果我是老費, 一定會用朴智星和CARRICK做雙防中, 史高斯較炮, 前線是TEVEZ朗尼C朗. 對巴塞不能與之鬥攻, 只能靠體力破壞他們的組織, 最少能立於不敗, 有史高斯的遠射和前線的把握能力, 即使只有一個機會都夠殺.
老費之敗, 在於輕敵, 又缺場上的領軍人才. 老將雖有經驗, 但也要有領導能力才可以, 是球員性格問題, 不是年齡問題. 這種人才可遇不可求, 但像老費這種高壓治軍, 求之亦不可得.
Chowchow: 謝. 近年少踢波少睇波, 得個講字, 見笑了.
收兄: 想不到你也來留言. 本年的巴塞確是神奇頂級超卓. 做其FANS真幸福也. 我頗認同巴塞的理念, 亦極討厭皇馬曼聯等輩的財大氣粗. 又, 今屆的三冠真材實料, 絕非十年前曼聯的符碌, 你作為FANS飲得杯落. (曼迷勿插, 符碌並非我的判斷, 是費SIR自述)
收兄﹖莫非”垃圾兄”你係以前在別的forum 碰過頭的老友﹖
唔介意的話﹐可否連結貴blog?
收兄: 也有此可能, 可惜我沒甚印象, 不過我也不時有看你的BLOG. 請隨便連結, 不用客氣.