畢業之後, 一直都搵唔到長工. 而家做緊補習老師, 所以暫時未駛餓死住.
其實我中七一考完AL, 就即刻走左去一間補習社度教中文. 人工唔錯. 讀大學, 讀master, 一直都有補開幾份習. 去到今日, 我都算係好資深下了. 所以人工都可以收得貴少少. 所以唔駛餓死.
我一直覺得, 補習係一種好奇怪既行業. 補習老師既目標, 係要令到學生不再需要自己. 但係當佢唔再需要你, 又代表你冇生意. 用咁既角度諗, 就會知道一般既補習社, 點解只係俾tips, 教捉題目, 而唔係真真正正教人點讀書, 傳授求學之道. 學生識得自己讀書, 等於補習社要執笠. 當然, 香港學生短視, 急功近利, 都係原因.
補習其實係一種好特別既教學經驗. 學生一定好多野問, 尤其是當佢地覺得自己係俾錢請個人返黎問既時候. 我估日校老師唔會面對咁既情形. 但係呢, 你要唔要答佢, 點樣答佢, 定係反問佢, 好鬼難拿捏. 答得佢太直接太仔細, 就怕佢會養成依賴. 答得太隱晦, 又怕佢get唔到. 唔答佢, 佢又會覺得你呃佢錢. 答得慢d, 佢又會以為你唔識. 其實好多時答得慢, 唔係因為唔識, 而係要決定要講d乜野, 要答幾多野.
其實有時會諗, 做補習甚至比做日校有意義, 尤其是o係香港. 做補習, 同學生上堂, 同平時學校o個種單向式的教學好唔同. 基本上你可以不斷要個學生俾反應你, 亦都可以同佢直接對話交流. 教佢d野明唔明, 識唔識, 唔駛睇樣, 一問就知. 甚至佢地既discipline同埋教養, 因為一對一容易建立rapport, 亦都相對地易教易管. 好多時我係唔止教書, 仲要幫埋人教仔, 而且往往佢地聽我話多過聽阿媽話. 可能我依然後生, 所以比較容易同d細路傾偈卦.
更重要既係, 我唔駛好似日校咁, d會開唔停, d無聊行政工作做唔停. 我上咁耐堂, 就同個學生interact足幾個鐘, 冇花冇假. 絕對唔會因為開會唔得閒理D學生.
今日AL放榜, 我有一個學生由佢中二補到而家. 佢CE同AL既中文都有A. 我覺得我咁多年黎教佢既野, 真係幫到佢. 今日收到呢個消息實在高興, 所以為文以誌. 不過佢其他科都係DDEE咁, 希望佢可以如願以償, 做大學生啦.
>> 補習其實係一種好特別既教學經驗. 學生一定好多野問, 尤其是當佢地覺得自己係俾錢請個人返黎問既時候.
咁好明顯你既補習學生年紀比較大。
我補過一些小朋友（其實都唔細，中四中五），補習係佢阿媽幫佢安排既，好明顯睇到佢係冇乜心機讀，補習時佢都係等時間過。
但，補過大學生，佢地主動要補習，都係因為知道自己追唔上課程，識得死，先會主動問問題。
嘩, 中四中五, 唔係小朋友啦. 真係仔都生得出. 我都係補中四中五多者.
基本上每一個新學生, 我都會搵一堂同佢講廢話. 同佢講咩叫讀書, 點解你會讀得唔好之類. 最後我會同d學生講, 如果你真係唔鍾意讀書, 唔想補習, 你同我講, 我會同你阿媽交代. 基本上如果個學生唔係真係好憎讀書, 呢招都可以boost up佢一頭半個月既.
我好鬼串, 如果我覺得個學生係冇心機既, 我真係會拂袖而去, 甚至劈炮的. 既然冇心機, 返學就話一定要返者, 冇理由一定要俾錢我賺架?
而家d學生好衰格. 唔收得貴, 佢又覺得你冇料到. 收得貴, 就係唔係都問, 驚蝕底. 臨考試就更加屎淋尿賴. 唉.
話明 “補習” ~ “補充學習” … 同 education 兩回事 la
thomlam:
咁就要睇下點補法.
如果係o個種俾tips, exam-oriented既補習, 咁就完全同教育冇乜關係. 只係一種應付考試既手段.
但係做私人補習, 係可以做到enlightenment既. 尤其是而家既日校, 根本冇能力因材施教, 飛起書上黎, 學生明唔明都唔得閒理. 反而我有時覺得, 私補教language, 教思維(例如寫作), 教出黎既效果會好過學校好多. 因為interaction多, 佢地要不斷用腦去諗去回應你既問題, 所以可以學得極之快同深入. 而且學生既進度, 係容易掌握好多.
當然補習仲未能夠取代正規既學校教育, 但係去到今日, 已經唔一定屬於主要 vs 補充既關係. 學校教育亦都唔係唯一既學習途徑. 不過要擺脫補習o個種商業化既本質, 的確係要努力的.
所以我話補習矛盾, 教識左佢思考, 自學, 根本就係違反市場規則
補多句. 甚至我既做法係, 用補習衝破學校教育o個種教條化, 亦都可以平衡官方意識型態既灌輸.
所以我教中化, 除左o個六篇八股文, 我都迫佢地睇費孝通, 柏楊, etcetc. 如果唔係, 佢地隨時真係以為中國文化乜都好.
>>補習係一種好奇怪既行業. 補習老師既目標, 係要令到學生不再需要自>>己. 但係當佢唔再需要你, 又代表你冇生意.
無論教到個學生識飛定係教完都點唔著佢，佢畢業的時候都唔會需要你。就算你唔專登教佢讀書，作為一個正常人，唔多唔少都會學到你諗野的一套方法。
其實無論補習定係日校，都不過係把知識換金錢而已，但補習試場激烈，為了保住飯碗，質素一定要有，否則就好似好多黯然離場的補習天王，不再被人記起。
Chester:
咁梗係要做到佢畢業之前可以行自動波, 唔駛靠補習, 甚至唔駛靠學校, 咁至叫成功啦. 如果唔係, 學生浪費緊自己d錢同時間, 去溝下女唔好?
o係香港, 教育作為一種向上爬既手段, 太深入民心啦. 所以大家老早忘記左education本來係一種enlightenment, 而唔係單純既知識換金錢. 咁當然啦, 我都唔會將自己講到咁偉大, 始終我係靠販賣知識為生. 但係希望除左賣知識之外, 真係可以幫到學生既成長者.
呢個平衡真係好難, 有時自己都會get lost的.